Friday, September 3, 2021

كيف تكون سعيدا بما معك في خمس خطوات



محمد سلطان - Mohammed Sultan

كيف تكون سعيدا بما معك في خمس خطوات

السعادة
سلام عليكم
صديقي البائس، وقبل ما تكون بائس أكيد كنت سعيد
وهنا خليني اسألك ياترى إيه اللي معاك يخليك سعيد تاني
معروفة..أنا بحب السؤال ده أوي
الفلوس
المال
Money
Para
Moneda 
تمام تمام..يعني الفلوس هي الحل
طب تخيل لو قولتلك إنك ممكن تكون سعيد بما تمتلك أصلا..بالفلوس اللي معاك
هتقولي يعني أنا لو معايا فلوس هقولك عايز فلوس ليه يعني
متركز شوية ياعم سلطان
صديقي الجميل أنت اللي ركز معايا
أنت معاك فلوس قليلة آه، وقد تكون عايش اليوم بيومه
لكن ده ممكن يخليك سعيد جدا وهثبتلك كلامي بالأبحاث 
في المملكة المتحدة عملوا بحث على حوالي ٥٠٠ فرد
لأعمار مختلفة من ١٨ وحتى ٧٥ سنة
ووجدوا إن الأفراد اللي عندها حساب بنكي وبتدخر هم الأكثر سعادة على المدى الطويل
هتقولي ياعم سلطان منا لو بدخر يعني معايا فلوس يعني سعيد
أنت مش مركز ياسلطان
ياحبيبي أنت اللي مش مركز
الإدخار هنا مش معناه آلاف الدولارات ..
ده معناه إن معاك قرشين صغيرين وبتحطهم في البنك
فيجيلك شعور بالنجاح وتحقيق الذات وتحس بالرضا في حياتك
الموضوع ملوش علاقة برجال الأعمال ولا أساطير المال 
أنت بس ادخر فلوسك وبلاش تصرفها في الحاجات الفارغة

ثاني شيء تعمله إنك تصرف في ما يعطيك وقت فراغ
ركز معايا
في ٢٠١٧ في ورقة بحثية نشرت في مجلة علمية بعنوان
Buying Time Promotes Happiness
البحث بيقول إنهم جابوا مجموعة من الأشخاص وادوا كل واحد ٤٠ دولار
وقالولهم استخدموا الفلوس في شيء يخليكم سعداء
البحث وجدت إن الأشخاص اللي استخدمت المال في شراء الوقت
يعني مثلا دفع الفلوس في شخص ينضفله البيت أو يشتريله الخضار
أو يدفعله الفواتير ويعمل المشاوير
النوع ده من الإنفاق كان بيسبب السعادة بصورة أكبر بكتير من واحد راح اشترى منتجات عادية
يعني اصرف مالك فيما يجعلك حر في يومك وعندك وقتك أكبر
اشتر وقتك ياصاح

النقطة الثالثة والمهمة هي إنك تصرف فيما يوفر لك حياة صحية وسعيدة
الأبحاث وجدت إن الأشخاص اللي بيناموا بشكل مريح وهادئ وكافي
هم الأكثر سعادة والرضا عامة في الحياة
يعني لو استثمرت فلوسك في شراء ما يوفر لك النوم والراحة والصحة 
فأنت كده سعيد بإذن الله
قول إن شاء الله
حضرتك ممكن تشتري مخدة طبية جديدة
لو معاك قرشين زيادة اشتري مرتبة طبية مريحة
اعمل اشتراك في الجيم بدل كل ما يوم تشتري هدوم جديدة عشان الهدوم القدية ضاقت وصغرت
اشتري أكل صحي 
حاجات كتير جدا تستحق إنك تصرف عليها لإنها استثمار في صحتك وسعادتك بإذن الله
قول إن شاء الله

النقطة الرابعة عشان تكون سعيد بما تملك فعلا هي إنك تسعد الآخرين
هتقولي يعني يا أخ سلطان هو أنا عارف أسعد نفسي لما أسعد الآخرين!
يا ولا..اصبر كده متبقاش ضيق
أنا بشوف شباب جميل كده كله أمل بس مرتبه ٣ آلاف جنيه وشغال بالعافية
بس شايل آيفون وبيروح يشتري كوباية قهوة ب ٤٠ جنيه كل ما يقبض عشان يتصور معاها
يا واد خلي عندك دم وحس على روحك
ربع قسط الآيفون ولا حتى تمن كوباية القهوة دي ممكن توفر بيها غدا لعيلة
آه ياجماعة ال٤٠ جنيه دول في ناس بتتغدى بيهم والله
تخيل إن المبلغ ده هيسعد أسرة كاملة ، تخيل إحساسك أنت بسعادتهم وإن ربنا يجعلك السبب فيها
سعادة حقيقية والله

النقطة الخامسة والأخيرة عشان تكون سعيد باللي عندك هي
أن تكون أولويتك التجربة وليس التملك 
عملوا بحث على أكثر من ١٠٠٠ شخص وقالولهم إيه أجمل تجربة شراء أو إنفاق في حياتكم
٥٧٪ من المشاكرين قالوا حاجات وفرتلنا تجربة جميلة، زي السفر مثلا، زي إنك تروح في رحلة
زي إنك تجرب حاجة جديدة في الحياة
٣٤٪ فقط من المشاركين قالوا إن سبب سعادتنا كانت شراء منتج جديد

يعني سعادتك الحقيقية لما تصرف فلوسك في تجربة تخليك سعيد
أنت بتعيش التجربة بحلاوتها وبتكتشف كل جديد وبتتعلم أكتر وأكتر
تخيل كده لو معاك ١٠٠٠ دولار وروحت جبت آيفوت
أو روحت سافرت لدولة في آسيا أو أفريقيا مثلا وعملت سفاري

إيه هو إحساسك بعد ١٠ سنين
لو اشتريت الآيفون فأنت كده خلاص سوري يعني موبايلك فقد الحياة وقديم ومتخلف جدا
لكن لو روحت الرحلة هتبقى في قمة السعادة
وكل شوية هتفضل تورينا صورك وتقولنا على اللي عملته وشوفته من عجائب الحياة
مش بعيد كل شوية تقولنا أصل احنا في الدولة دي بنعمل كذا كذا كذا
وتكلمنا كأنك أصبحت أحد المواطنين هناك أصلا.
عارف أنت الناس دي 

وهنا تكون النهاية، ولكن تذكر
ما النهاية إلا بداية جديدة، ومن يدمن قرع الباب يوشك أن يفتح له
سبحانك اللهم وبحمدك، أشهد أن لا إله إلا أنت، أستغفرك وأتوب إليك
سلام عليكم




المصدر
https://www.psychologytoday.com/intl/blog/activating-insights/202108/how-get-more-happiness-the-money-you-already-have
 

No comments:

Post a Comment